Assim foi como a oligarquia industrial e financeira basca se afiançou, afiançou a classe capitalista basca de que era elite como classe hegemónica e espoletou a industrializaçom de Biscaia. Vagas de imigrantes, vindos de fora do País Basco e da área rural do mesmo, achegárom a mao-de-obra crescentemente procurada. A populaçom de Biscaia é um indicador do processo: 111.438 habitantes em 1833, 160.579 em 1857, 189.954 em 1877, 311,351 em 1900. A urbanizaçom é um outro processo paralelo. Olhando apenas Bilbau, adverte-se que a sua populaçom salta dos 35.505 habitantes de 1877 aos 83.306 de 1900. Dos quais apenas 35% nascera em Biscaia, 16% procedia do resto de Euskádi sul e 47% do resto dos territórios do Estado espanhol.
Imigraçom e urbanizaçom serám dessarte dous processos que acompanham como causa e efeito a industrializaçom, constituindo o núcleo duro das transformaçons sociais da formaçom social basca, com fundas repercussons na sua vida cultural e política. Segundo os dados do Censo de Populaçom (corrigidos e depurados por Ignacio OLABARRI na página 447 da sua obra Relaciones laborales en Vizcaya (189~1936), Leopoldo Zuzaga editor, Durango, 1978) em 1900 um terço da populaçom activa de Biscaia, 42.738 pessoas, trabalha já no sector industrial. Em 1920 as 69.014 pessoas do sector industrial suporám 43% da populaçom activa, por cima já de 24% no sector agrário e 33% no sector serviços. (32)
Esta tríada de transformaçons sociais (industrializaçom, urbanizaçom e imigraçom) provocará um facto de importantíssimas conseqüências para a configuraçom e a evoluçom do "problema basco": a progressiva diferenciaçom e separaçom estrutural do subsistema marítimo basco (Biscaia e Guipúscoa) do subsistema interior basco (Álava e Navarra) cujos níveis de industrializaçom, urbanizaçom e imigraçom vam ser muito mais baixos e que vai ficar basicamente agrário, rural e autóctone. Só depois de 1950, na segunda metade do século XX, é que um celérico processo de industrializaçom, urbanizaçom e imigraçom em Álava e Navarra tornará a soldar a unidade da infraestrutura económio-social dos dous subsistemas bascos e as explosivamente crescentes (e dominantes no seu ámbito provincial) aglomeraçons metropolitanas de Vitória e Pamplona serám engolidas pola expansom "em mancha de óleo" da conurbaçom industrial Bilbo-Donostia para que apareça CINDU-EUSKÁDI, a Cidade Industrial chamada Euskádi.
O processo de industrializaçom, urbanizaçom e imigraçom de Guipúscoa segue pautas e modelos próprios, diferentes dos biscainhos, como demonstrou Luis Castells (Modernizaçom e dinámica política na sociedade guipuscoana da Restauraçom, 1876-1915), Serviço editorial da Universidade do País Basco, Leioa (Biscaia), 1987). Mas na página 188 da sua obra, Castells mostra como já em 1900 o Censo contabiliza um terço da populaçom activa, 28.634 pessoas, no sector industrial. Que subírom a ser 40.142 em 1920, 41%. Por cima já de 35% no sector agrário e de 24% no de serviços. (33) Haverá que esperar a 1960 para que a populaçom activa industrial seja majoritária em Álava e a 1970 para que o seja em Navarra.
|
|
|